Op Weihnachte jo-ev et e schönn Jeschenk. Dat Jeschenk heesch möt Vürnam LORd on möt Huusnam Devaudee. LORd ess ärsch höflich. Hä stellt sech alle naselang vür. Und dat jeht eso:

LORd Devaudee hätt natürlich enne Displee. Wenn man dr Strom enschalte deet, dann kütt sinne Nam:

„LORd“

Also nix wie dat selverije Deng en dä Schlitz on op/p>

„Play“

jedööt. On loss jeht et. Kütt als nächstes:

„go on“

Jemäkk. Kütt en dä Fernseher:

„Falsche Eingabe“

Mann, dä spreck jo Dütsch. Aha, dä ess jo och von Siemens, obwohl so jet net unbedingt jet heesche soll. Dann es dä Fernseher schwatt, alles fott un en dat Displee steht

„LORd“

Noch enns von vüüre. Dann net

„weiter“

sondern

„Start“

Et kütt jet. Dann stellt LORd son englische Froch. Also joot:

„o.k.“

Alles fott. Dann en dat Displee

„LORd“

Noch enns von vüüre. Net op o.k., sondern op dat angere. Un et fängt enne Film aan. Et Meer ruuscht, de Musick es schönn. Äwwer die Männekes en dä Film, die sare nix. Enns

kicke, wat et noch för Schalter jöv. Ah jo, do ess jet, dat süt uut wie enne kleene Lautsprecher. Drop jedröck. Alles fott.

„LORd“

Je esset äwwer joot. Dat janze Krom uutjeschaltet un de Blare alameert. Solle die doch däm Blödmann de Spro-ak beebrenge. Denne hätt man fröher jo och et Sprä-eke jeliert.

© Manfred Dülpers 2007