Et jöv jo Frollüt, die sech dorü-ever beklaare, dat dä Frisör för die emmer völl dü-eder ess als för de Mannslüt. Dat ess jo och eso. Äwwer waröm?

Och hüüt ess dat meestens noch eso, dat bem Frisör de Frollüt un Mannslüüt jetrennde Abteilunge hant. Doch letzte Ki-er be däm Frisör wo-er dat net eso. Do so-ete de Mannslüt un de Frollüt nevenenanger. Un do hott man dä Verjliek.

De Mannslüt komme en dä Salon, schnappe sech en Zeidung und dä Meester fängk an ze schnibbele. Dä froocht dann: „Wat hälste von Borussija““ – „Ja nix.“ Un dann lääst dä widder. No en Vi-edelstond kütt dä Chef möt dr Spejel un froocht: „Juut so?“ – „Juut eso!“ – „Vetteenfoffzisch.“ – „Schö!“ – „Schö!“

[inspic=83,,,380]On de Frollüt? Do mot i-esch enns üvverleit un en de Läng un de Breet diskuteert werde, ob möt odder o-ene Wäsch, kü-eter odder net, möt Strähnches odder net, Dauerwell odder Lockwell, blond odder fuss odder överhaup jet janz angisch. Wenn man sech dann geeinischt hat, jeht et i-esch richtisch loss: Dat de Schwejermodder unmöööchlich ess, wat de Blaare för enne U-esel makke un Männe sech och net so benemp, wie frau sech dat vürstelle ding on wie dat alles ze rejele wü-er. Dat wött vom letzte Arztbesök vertellt – emmer Kopping – un wat man dojän maake köss. Dann kütt dä nächste Urlaub draan „Hasse en Idee, wo man enns hinfahre köss?“.

Nu duurt dat alles sinn Tied un völl länger als be de Mannslüt. On dat koss och offiziell nix extra. Äwwer dat ess janz jet angisch als bloß Hooreschni-e. Dat ess och: Familienberatung, medizinische Beratung, Psychotherapie, Reisebüro … Die Hoor zu maake es eijentlich bloß Nä-evesaak. Wenn man sech jez noch vürstellt, wat die enkele Spezialiste kosse, dann ess dat be enne Frollüt-Frisör noch richtisch bellich.

© Text: Manfred Dülpers 2007